Монгол хүүхдүүд Азийн олон улсын хүүхдийн кино фестивалаас тусгай шагнал хүртлээ

Ж.Ирээдүй, 2010.12.08, Токио

21 дүгээр зууны Зүүн Азийн хүүхэд залуучуудын өргөн хүрээний харилцааны хөтөлбөрийн хүрээнд Монгол хүүхдүүд Японы Кагошима аймгийн Ибүсүки хотод болж байгаа Азийн олон Улсын Кино Фестивалд оролцлоо. Уг фестивал нь энэ жил “Гэр бүл” гэсэн сэдвээр болж байгаа бөгөөд Япон, Монгол, Камбож, Солонгос, Лаос, Малайз, Хятад, Мянмар, Тайван, Тайланд, Вьетнам зэрэг 10 орон бүс нутгаас хүүхдүүд бүтээлээ ирүүлж шалгарсан байна. Насны хувьд бага ангиас ахлах ангийн хүүхдүүд оролцжээ.

Монгол Улсаас СУИС-ийн Радио, Телевизийн Дээд сургуулийн сургалтын албаны дарга Д.Одсүрэн багштай 8-16 насны 10 хүүхэд оролцож байгаагаас Бямбадоржийн Ганчөдөр “Тэдди ба би”, Эрдэнэбилэгийн Нямдорж, Одонхүүгийн Гончигсумлаа  нар  “Гэртээ хоёулаа”, Багмидийн Лхагвадорж “Миний гэр бүл”, Бандихүүгийн Бүжинлхам “Миний гэр бүл”, Төрбатын Баасанбат, “Нохойн бүл”, Соронзонболдын Цэрэндулам “Монголын гэр бүл”, Одсүрэнгийн Саруултуяа “Миний дотны хүмүүс - манай гэр бүл”, Батбаярын Бат-Энх “Эр хүн, эх орон”, Одбаярын  Хүслэн “Эх газар чинь таны гэр бүл” зэрэг бүтээлээрээ уралдаж Эрдэнэбилэгийн Нямдорж, Одонхүүгийн Гончигсумлаа нарын бүтээл “Гэртээ хоёулаа” богино хэмжээний кино тус наадмын тусгай шагнал хүртлээ. Энэ бүтээлд жирийн малчин айлын ихэр хүүхдийн өдөр тутмын амьдралыг үзүүлдэг бөгөөд хэдий насан бага ч өглөөнөөс үдэш хүртэлх их ажлын зах зухаас хамжилцан завгүй гүйж, үхрээ бэлчээж, тугалаа хариулж, хашаа хороогоо цэвэрлэж, морио унаж, мод чулуугаар тоглож, таргаа ууж, тааваараа унтдаг жирийн малчны монгол хүүхдийн амьдралыг товч боловч үзүүлдэг юм.

Энэ наадамд шалгарсан бүтээлүүдийг дэлгэцэнд үзүүлж, агуулга, санаа, ур хийцээр нь өрсөлдүүлсэн байна. Мөн тус наадамд бүтээлээрээ оролцогчид өөрсдийн авьяас чадвараа үзүүлж манай хүүхдүүд монгол ардын биелэгээ, бүжиг болон ардын дуу хуураа сонирхууллаа.
Наадамд оролцож байгаа хүүхдүүд явахын өмнө Токиогийн Гадаад Судлалын Их сургуульд нэг өдрийг өнгөрөөж энд Япон орон, японы соёлын тухай лекц сонсож, япон хэлний анхан шатны хичээлд сууж, тус их сургуультай танилцлаа.
Мөн монгол судлалын ангийн оюутнуудад өөрсдийн хийсэн бүтээлээ сонирхуулан, тэдний санаа бодлыг сонсож, асуултад хариулсан юм. Япон оюутнууд тэдний яаж бүтээлийнхээ санааг олсон, жүжигчдээ хэрхэн сонгосон, уран бүтээл хийхэд техникийн нөхцөл хэр байдаг зэрэг олон асуулт асууж хариулт авсан билээ.
Мөн тус их сургуулийн монгол хэлний ангийн япон оюутнуудын гэрт нэг хоног сууж үзсэн нь японы ахуй ёс заншилтай биечлэн танилцах сайхан боломж боллоо.

Энэхүү хөтөлбөрийг зохион байгуулж, хүүхдийн кино наадамд оролцуулж байгаа Японы Олон Улсын Хамтын ажиллагааны төв  (JICE) нь 1977 онд байгуулагдсан бөгөөд Японы Олон Улсын хамтын ажиллагааны нийгэмлэг буюу ЖАЙКА, Олон улсын Хамтын ажиллагааны Япон Банк, засгийн газрын болон төрийн бусад байгууллага, хувийн хэвшлийн байгууллагуудаас хэрэгжүүлэх үйл ажиллагаа, төслийг биелүүлж хэрэгжүүлэх зорилгоор байгуулагджээ. Үйл ажиллагааны 14,4 миллиард йэний төсөвтэй,  561 ажилтан албан хаагчтай, энэхүү байгууллага нь “манай дэлхийн төлөө, маргаашийн төлөө мэдлэг туршлагаа хуваалцая” гэсэн уриатай ажилладаг юм байна. Тус байгууллага нь Гадаадын мэргэжилтнүүдэд зориулсан олон улсын менежментийн дадлага хийх, гадаадын олон хэлний орчуулга хийх, япон хэлний сургалт зохион байгуулах, гадаад оюутнуудыг сургах, харилцан солилцох хөтөлбөр хэрэгжүүлэх, олон улсын семинар зохион байгуулах, техникийн тусламж дэмжлэг үзүүлэх, үндэсний мэргэжилтнийг дадлагажуулах, боловсролын хөгжлийн асуудлаар хамтран ажиллах зэрэг олон төрлийн үйл ажиллагаа явуулдагаас  Монгол Улстай холбоотой төрөл бүрийн үйл ажиллагаа  санаачлан зохион байгуулдаг уга байгууллагын Монгол дахь салбар нь МУИС-ийн Монгол Япон төв дээр байрлаж байгаа ажээ.